India leh Bangladesh-te'n Waterway project atan inremna ziak

Union Minister of State for Road Transport and Highways and Shipping Mandaviya chuan, Brahmaputra lui kaltlanga India leh Bangladesh-te inkalpawhna tur waterway project atan inremna ziah a nih thu a puang.

Union Minister Mansukh Mandaviya hian kar kalta Inrinni khan Tripura khawpui, Agartala-a thuthar thehdarhtute hmaah he thu hi a sawi a, hemi atan hian inremna pawh ziah fel tawh a nih thu a sawi. "India sorkarin a ram chhunga tui chunga inkalpawhna tur hi a siam ang a, Bangladesh sorkar pawhin a ram chinah inkalpawhna tur hi a siam dawn a, hei hi ram pahnihten kawng hrang hranga inlaichinna leh, insumdawn tawnna ṭha zawk an neih theihna tura ruahman a ni" a ti. Hna hi ṭan thuai tura hma lak a ni a, ram pahnih sorkar te chu thawhhona ṭha tak an neih a beisei tih, Mandaviya chuan a sawi bawk.

Union minister chuan sorkar laipui chuan hmarchhakin kawng hrang hranga hma a sawn theihna turin ruahmanna a siam tih a sawi a, project pawh eng emaw zat duan a nih thu a sawi. Heng zingah hian waterway project 16 a tel a, hei hi ṭhenawm ramte nena awlsam zawka inkalpawhnan tur leh insumdawn tawnna tura tih a ni. India - Bangladesh border thui zawng chu km 2,979 a ni a, heng zinga km 1,116 zet chu tui hmanga inkalpawh theihna a ni. Lui lian tak tak 54 zet chuan ram pahnih hi an paltlang a, chung zingah chuan Brahmaputra lui pawh a tel a ni, Mandaviya chuan a ti.

Minister Mandaviya hian kar kalta Inrinni khan Tripura a tlawh a, Chief Minister Manik Sarkar leh Governor Tathagata Roy-te waterway project kalpui tur chungchang a sawipui a ni. National Highways and Infrastructure Development Corporation leh Tripura PWD Department te meeting a neih­pui bawk. Tripura Transport Secretary Samarjit Bhowmik chuan ṭhenawm ram Bangladesh nena awlsam zawka tui chunga inkalpawhna siam tur hian state sorkar chuan sorkar laipuiah rawtna a lo thlen tawh tih sawiin, a hlawhtlinna an hmu chho ta chu lawmawm a tih thu a sawi. He project atan hian Shipping Ministry chuan cheng vaibelchhe 12 a ruahman tih sawiin, state sorkar chu Detailed Project Report (DPR) thehlut tura ngen an nih thu a sawi bawk.

Tun dinhmunah tui chunga India - Bangladesh inkalpawhna kawng hi pali a awm a, Kolkata-Pandu (Southern Assam) via Bangladesh, Kolkata-Karimganj (Southern Assam) via Bangladesh, Rajshahi (Bangladesh)-Dhu­lian (Southern Assam) leh Karim­ganj-Pandu-Karimganj via Bangladesh-te chu hman theiha awm mek te an ni.