Assam-ah loneitu intihlum

Assam-a Morigaon district-ah tunhnai khan loneitu pakhat chu tuilianin a chenna-in, ram leh thlai chinna hmun te a tihchhiat avangin amah leh amah a intihlum.

Police-te chuan loneitu Kushal Nath (45) hi Pathiani khan Bhuragaon-a relief camp-ah a intihlum tih an sawi. Kushal Nath hi Nijsohoria khuaah a cheng a, June thla tir aṭanga tuilian nasa tak khan a chenna-in leh thlai chinna hmun te chu a tichhe vek a, hei vang hian a intihlum ta mai nia tarlan a ni. Assam-ah hian tuilian vangin mi 70 chuang an thi tawh a, nunna chan hi an la pung chho zel a ni. State khawpui Guwahati chu nunna chan tamna ber niin, mi pariat an thi tawh a, an zingah hian current man hlum pawh an awm a ni. Assam State Disaster Management Authority (ASDMA) chuan Pathianni thleng khan tuilian tuar hi mi 60,000 vel an la awm tih an sawi a, Lakhimpur, Biswanath, Barpeta, Morigaon, Nagaon, Golaghat, Jorhat, Sivasagar leh Karimganj district-te chuan harsatna hi an la tawk mek a ni.

Assam-a tuilian hian electric ban eng emaw zat a titlu a, hei hian hmun tam takah chhiatna a thlen a ni. Electric kalsualin a man hlum eng emaw zat an awm a, state sorkar chuan Power Deparment chu fimkhur turin a chah hial a, electric-in a man hlum mi eng emaw zat an awm chu pawi a tih thu a sawi a ni. An zingah hian zirlai naupang pawh an tel a ni.