Nagaland : NPF-te court-ah zualko dawn

Nagaland-a rorel lai Naga Peoples Front (NPF) party chuan an party MLA 36-te disqualify an nih theih nan court-ah an zualko tur thu an puang.

NPF thuchuah chuan, "Chief Minister T R Zeliang-a'n floor test a paltlang theih nana amah thlawptu an party MLA 36-te chungchang chu ngaihtuah a ni a, disqualify an nih theih nan Court-ah thlen a ni ang" an ti. NPF-te hian petition hi nimin khan Guwahati High Court, Kohima Bench-ah an thehlut a ni. NPF MLA Kuzholuzo Azo Nienu chuan Na­ga­land Legislative Assembly (NLA) Spea­ker Imtiwapang Aier-a thutlukna siamah an lungawi lo tih sawiin, speaker hnenah ziaka ngenna an thlen chu chhan a nih loh thu a sawi. NPF kaihhruiai Democratic Alliance of Nagaland (DAN) sorkara chairman Kuzholuzo Azo chuan hemi chungchang hi Court-ah thlen turin thutlukna an siam ta tih a sawi. Hetih rual hian NPF, BJP, NCP leh JD(U)-te chu an thawkho zel dawn tih a sawi bawk.

Hetih lai hian Na­galand Chief Minister thar T R Zeliang chuan nimin khan cabinet minister tur pakhat a ruat leh a, cabinet minister 11 a nei dawn ta a ni. Governor P B Acharya chuan cabinet minister atana ruat thar EE Pangteang chu nimin khan Raj Bhava-ah rinawmna thu tiam tirin a la lut nghal a ni. EE Pangteang hi Naga People’s Front (NPF) MLA a ni a, amah lawmluhna inkhawm hi CM Zeliang, Assembly Speaker Imtiwapang Aier leh senior bureaucrat-te chuan an hmanpui a ni. NPF chuan cabinet minister 9 an nei a, Bharatiya Janata Party (BJP) chuan pa hnih an nei ve bawk.