Assam-ah zirlai pawl ngaia ṭhut nawn tir 30,000 awm

Assam-a pawl riat zirlai 30,000 chu pawl ngaiah ṭhut nawn tir an nih thu, Comptroller and Auditor General (CAG) report-ah tarlan a ni.

Assam-ah hian kum ruk chhungin pawl riat zirlai 30,000 chu an pawl ngaiah ṭhut nawn tir an ni a, hei hi a chhan ber chu Right of Children to Free and Compulsory Education Act, 2009 hman vang a nih thu tarlan a ni. Hetih chhung vek hian Arunachal Pradesh-ah pawh pawl riat zirlai 12,000 chu an pawl ngaiah ṭhut tir an ni. Zirlai naupang kum 14 chin chunglam eng emaw zat chu a thlawna zirna an dawn theih nan pawl hniam zawkah ṭhut tir an ni a, heng mite hi school an luh tirh lama zirna zawmṭha lo leh, class kal mumal loa pawl sawn ve hram hram ṭhin te an nih thu tarlan a ni bawk.

Hetih lai hian Right to Education Act chuan zirlai naupang chu elementary chinah chuan, pawl hniam zawkah ṭhut nawn tir emaw zirna-in aṭanga hnawhchhuah phal loh a ni. CAG report chuan naupang kum 14 aia upa eng emaw zat chu elementary chinah ṭhut luih tir an ni a,hei hi danin a phal loh leh, thil dik lo titute chu hrem theih an nih thu a tarlang. Hetih lai hian Sikkim-a East District-ah pawh zirlai eng emaw zat chu an kumin a phak tawh lo chungin a thlawnna zirna an hmuh theih nan pawl hniam zawkah ṭhut tir an nih thu tarlan a ni bawk.