BRO-in Arunachal-ah tunnel siam dawn

Border Roads Orga­nisation (BRO) chuan Aruanchal Pradesh-a Sela Pass-ah tunnel pahnih an siam dawn a, hei hi awlsam zawka China border kalpawh theihna tur a nih thu tarlan a ni.

BRO chuan Sela Pass-ah hian India leh China inrina awlsam zawka kalpawhna turin lei meter 4,170-a thui verh a ni dawn tih an sawi. Hei hian Tawang aṭanga International Border panna chu km 10m zetin a tihhnaih phah dawn a, ramri thleng turin hun pawh a ngai rei lo sawt dawn a ni. Hmun hnihah lei hi verh a ni dawn a, meter 475 leh meter 1,790-a thui tein verh a ni ang. Leiverh hian Nurarang aṭangin Balipara-Chaudur-Tawang road a pawh dawn a ni.

42 border road task force commander, RS Rao chuan BRO Project a taka kalpui tur hian West Kameng deputy commissioner Sonal Swaroop chu ram endik hna thawk turin an ngen tih a sawi. Swaroop chuan ram endik hna hi thawh ṭan thuai beisei a nih thu sawiin, project hi kalpui thuai an beisei tih a sawi. He project hian National Highway tihzauh a, double-lane-a siam pawh a huam dawn a ni. Commander, RS Rao chuan leiverh hi zawhfel a nih hun chuan Tezpur leh Tawang-a Army 4 Corps headquarters chu darkar khat velin a pan chhung a reilo sawt dawn a, km 10 velin a hnai zawk dawn a ni, a ti.

Arunachal Pardesh leh a chheh velah hian China leh India te chu an innghirngho fo a, ramri chungchangah an inhmu thiam lo a ni. Arunachal-a Tawang hi China chuan a ram chhunga awm niin a sawi a, mahse India sorkar thuneihna hnuaiah a awm a ni. China chuan a thuneihna hnuaia awm, Tibet ram huam chhunga awm niin Tawang hi a chhal a, hei hian ram pahnih inkarah buaina a chawk chhuak fo a ni. Kumin kum tir lam khan Tibetan sakhaw puithiam Dalai Lama chuan Tawang hi a tlawh a, hei pawh hi China chuan na takin a sawisel a ni.

Tuna Border Roads Orga­nisation (BRO)-in tunnel siam an tum pawh hi China chuan a helh hle rin a ni.