ANSF-te'n Rehabilitation Policy siam phut
Arunachal Pradesh-a zirlai pawl Arunachal Naga Student’s Federation (ANSF) chuan Chief Minister Pema Khandu chu hel pawl aṭanga sorkar kuta inpe duhte tan surrender and rehabilitation policy siam tura an phut thu an sawi.
ANSF-te chuan Arunachal-a Naga ṭhalai 500 vel zet chuan hel pawl an zawm tawh tih an sawi a, heng mite hi nunphung pangngaia an awm leh theih nan state sorkar chu policy duang turin an phut tih an sawi. Chief Minister Pema Khandu chu hemi kawngah hian hma la turin an phut a, Naga helten sorkar kuta inpek duhna an neih theihna turin an hamṭhatna tur kawng ngaihtuah sak an duh tih an sawi. Assam sorkarin kum 1998-a a duan tun thlenga a la hman, surrender and rehabilitation policy zulzuiin policy hi duan ve an duh thu an sawi bawk.
ANSF-te chuan Naga te chenna - Tirap, Changlang leh Longding-ahte paramedical college din an phut thu an sawi bawk. ANSF President Nokchai Boham chuan Naga-te chuan ngaihsak an hlawh tawk lo tih sawiin, state sorkar chu kawng hrang hranga an hmasawnna tura ngaihtuah sak turin an phut tih a sawi. Boham chuan autonomous council din an phut thu te, Sainik school din anih theih nan te, ṭhalai tam zawk Indian defence forces an luh theih nan kawng hawn sak an phut thu a sawi.
An thil phut chungchangah hian Defence Minister Arun Jaitley leh Union Home Minister Rajnath Singh-te hmuh an tum thu a sawi bawk.