Assam-a tuilianin ziawm lam a pan zel

Assam-a tuilian chuan ziaawm lam a pan zel nia tarlan a ni. Thawhṭanni thleng khan Brahmaputra leh Barak lui fintute chuan hmun tam takah harsatna an la thlen a, hetihrual hian tuilian avanga harsatna hi a ziaawm hle tawh tih tarlan a ni. Assam State Disaster Management Authority chuan district 10-a khaw 157 chuan harsatna hi an la tawk tih an sawi. Tuilian hi a nasat lai ber khan mi nuai 20 chuangin an tuar a, tunaah chuan mi 29,242 vel chauhin harsatna an tawk tawh niin an tarlang bawk.

Hetih lai hian Dhemaji, Lakhimpur, Barpeta, Morigaon, Nagaon, Karbi Anglong, Golaghat, Jorhat, Sivasagar leh Karimganj-te chuan tuilian hi an la tuar a, mi eng emaw zat chu relief camp-ah an la khawsa a ni. Tuilian avang hian mi 76 an thi tawh a, hliam tuar mi eng emaw zat an awm bawk. Chenna-in nei lo mi tam tak an la awm a, hmun tam takah sorkar chuan an khawsakna tur a ruahman sak a ni. Assam-a tuilian tuarte ṭanpuina tur hian sorkar laipui chuan sum ṭhahnem tak a ruahman sak a, thlai chingtute leh in leh lo chante hnenah ṭanpuina hi pek chhuah a ni ang. Sorkar laipui chuan hmarchhaka chhiatna hrang hrang thleng ṭanpuina tur hian sum tak tak ruahman a nih thu a lo puang tawh a ni.

Kuminah hian ruah sur nasa avangin chhiatna thleng a tam hle a, hmarchhak state hrang hrangah nunna chan an awm a ni. Assam, Manipur, Mizoram, Arunachal Pradesh leh Nagaland-te chu harsatna tawk nasa zual an ni. Heng state-ahte hian leimin, tuilian leh a kaihhnawih avangin mi tam takin chhiat an tawk a ni.