Inremna thuthlung zawm lote hrem an ni ang : Manipur CM

Manipur Chief Minister N Biren Singh chuan sorkarin hel pawl eng emaw zat inremna a ziahpui tawh tih sawiin, inremna thuthlung te hi zawm ṭhat a ṭul thu leh a zawm lo te chu dan anga hrem an nih zel tur thu, Assambly House-ah a sawi chhuak.

Manipur CM Biren Sing chuan hel pawl - Kuki National Army (KNA)-te chu sorkar laipuiin inremna, Memo­randum of Understanding (MoU) a lo ziahpui tawh tih sawiin, hetih lai hian KNA mi leh sa ten inremna palzuta mi nunna hial an la chu pawi a tih thu a sawi. KNA-te hian Pathianni khan Manipur-a Moreh-ah naupang an that a, hei hian inremna lo ziah tawh chu a bawhchhia niin CM chuan a sawi. Biren Singh chuan, "KNA-te pawikhawihna hi a demawm takzet a, inremna hi palzut mai theih a ni lo a, dan hmangin hremna pek an ni ang" a ti.

Biren Singh chuan dan loa pawi­khawihna thlen ṭhin te venna kawngah state police-te chuan security force-te an pui zel dawn tih sawiin, mipuite himna turin theihtawp an chhuah zel tur thu a sawi. Tun hnaia Moreh-a pawikhawihna thleng chu a dem thu sawiin, nunna chan chhungte a tawrhpui thu a sawi. Hetih rual hian sorkar laipui chu KNA-te nena inremna lo siam tawh ennawn turin a phut tih a sawi a, tun hnuah pawikhawihna a thlen tawh lohna turin chak zawka hma lam turin an phut tih a sawi.

Manipur CM chuan tun hnaia Sharma Enterprises-te'n Congress President, T N Haokip-a thlalak BJP hruaitute zinga an tarlang tel chu a dem thu sawiin, hetiang kawngah hian fimkhur a ṭul thu a sawi bawk. Sharma Enterprises-te chetdan hi Congress party tihmualpho....na leh, party tihmualpho tumna a nih thu sawiin, a dem thu a sawi bawk.