TMC-in Tripura unit President a ban

Trinamool Congress (TMC) chuan Tripura-a an party president Subal Bhowmik a ban.

All India Trinamool Congress (AITC) chuan party Tripura-in-charge Rajib Banerjee leh Rajya Sabha MP Susmita Dev-te chu party hruaitu ruat a nih hma chu Tripura unit hi enkawl turin a ruat nghal a ni.

Subal Bhowmik hi TMC lak aṭang hian hun eng emaw chen a inla hrang tawh a, party thiltih pawimawhah te a tel lo fo a ni. A chungchang hian ngaihven hlawh viau mah se TMC lam hian engmah an sawilang ngai lo a, mahse ban a nih thu a rawn puang ta a ni.

BJP lam chuan Bhowmik hian an party a zawm dawn niin an sawi zui nghal a, August 28-a ni hnih cham tura BJP national president JP Nadda-a'n Trpiura a tlawh hunah lawmluh a ni dawn niin an sawi.

Bhowmik hi party hrang hrangah a awm kual tawh a, Congress party aṭangin a political career hi a ṭan a, mahse a hnuah chhuahsanin Progressive Rural Congress-ah a lut. Trinamool Congress a zawm leh a, mahse rei a awm hmain an state-a BJP an rawn len chhoh hnuah kum 2018 inthlan dawn khan BJP a zawm a, party ticket-in assembly inthlanah ding mah se a chak zo lo. BJP in sorkarna an chan hnuah kum 2019 Lok Sabha inthlanah khan Congress ticket-in a chuh leh a, he inthlanah pawh hian a chak zo lo leh bawk. A hnuah Trinamool Congress a awm a, state TMC President-ah ruat a ni zui a ni.