Manipur-ah Rs vbc 17 hu brown sugar man

Manipur police leh Assam Rifles sipaiten joint operation an neihnaah Thawhlehni khan Myanmar ramri bul, Moreh khuaah brown sugar, Rs vbc 17.20 man hu an man.

Security force joint team hian thu an dawn bawhzuiin, Thawhlehni zing khan Moreh, Tengnoupal district-a Frines Bridge area-ah beihpui an thlak a, Border Pillar 77 bulah Myanmar aṭanga India rama rawn lut, mi pahnih an hmu a, heng mite hian security force-te hi an hmuh veleh an bungrua tlansanin an tlanchhe zui a ni. An bungraw tlansan hi enfiah a nih hnuah brown sugar kg 8.6 a lo awm a, hei hi Moreh Police kutah an hlan nghal.

Kar liam ta Zirtawpni khan Tengnoupal district-ah vek hian Rs vbc 8.6 hu brown sugar man a lo ni tawh bawk. Assam Rifles sipaite chuan sahbawn bawm 20-a brown sugar dah hi Imphal-Moreh Highway-a motor tlan an endiknaah an man a ni. A neitu nia puh Churachandpur district mi pakhat pawh an man tel bawk.