Tripura-ah BJP leh TIPRA worker-te intibuai

Tripura khawthlang lam, West Tripura District-a Mungiakami khuaah Thawhlehni khan Bharatiya Janata Party (BJP) leh tribal district council area-a rorellai, TIPRA Motha party worker-te intibuaiin, mi eng emaw zat an hliam.

BJP hruaitute chuan TIPRA lam hian an mi leh sate chu awmze nei loin an bei hmasa niin an puh a, tribal area-a BJP lian zel tur an hlauthawng niin an sawi. BJP Janajati Morcha state president Bikash Debbarma chuan Mungaikami market-ah BJP chuan hun hman an tum a, BJP national president JP Nadda-a'n Tripura a tlawh tur leh, August 29-a Khumulawng-a public rally a neih tur chungchang mipuite hriattir an tum tih a sawi. BJP party office hmaa an punkhawm laiin TIPRA worker-te hian an rawn bei ta mai niin a sawi a, hliam tuar zingah Debbarma pawh hi a tel a ni.

Hetih lai hian TIPRA hruaitute chuan ‘Greater Tipraland’ state hran phuta an mi leh sa pungkhawmte chu BJP worker-te hian elsen takin an lo aukhum hmasa a, hei vang hian buaina a chhuak zui ta niin an sawi ve thung. TIPRA worker pahnih chu police-te kut an tuar avangin hospital panpui an ni tih an sawi bawk.