China-in Doklam-a a sipaite hnukkir turin India vau nawn leh
China chuan Sikkim sector-a India sipaite chu an ramah kir turin a vau nawn leh. China, Bhutan leh India inrina tri-junction-a Doklam-ah hian India chuan China sipaite kawngpui sial tum dang turin a sipai ṭhahnem tak a dah a ni.
China Foreign Minister Wang Yi chuan, "India hian Doklam tri-junction-a a sipaite hi thu delhkilh awm loin, July 27 leh 28-a Beijing-a Brazil, Russia, India, China and South Africa (BRICS) NSA summit neih hmain a hnukkir tur a ni. India National Security Adviser (NSA) Ajit Doval-a'n China a pan hmain India sipaite hi an ramah an kir vek tur a ni" a ti. Foreign Minister chuan India sipaite hi an ram lamah hnuhkir an nih thuai loh chuan boruak duhawm loh zawk a thleng thei tih sawiin, India chu an ngenna ngai pawimawh turin an phut tih a sawi bawk.
Chinese Defence Ministry chuan India sorkar hnenah Doklam-a a sipaite hnukkir turin a lo ngen tawh a, an ngenna hi a hlawhtling lo a nih chuan ram pahnih inkar boruak pawhin a tawrh phah theih thu a sawi a ni. Hetih lai hian India chuan Doklam-a a sipaite hi tun thlengin a la hnukkir lo a, China sorkar chetdan chu a dem thu a sawi ve thung. Doklam-ah hian Chian chuan kawngpui sial tumin hma a la a, a sipai ṭhahnem tak a tirlut a ni. Mahse hei hi a ṭhenawm ram India leh Bhutan-te chuan an dodal nasa hle a, India sorkar chuan China sipaite dang tur hian sipai eng emaw zat a tir lut a ni.
Indian Vice Chief of Army staff Lt. Gen. Sarath Chand chuan, China sorkar chetdan hi ngawihbopui mai chi a ni lo a, nakin hun zel atana ramhimna tiderthawng thei a ni tih Thawhlehni khan a sawi. Lt. Gen. Sarath Chand chuan ram himna turin hma an la zel dawn tih sawiin, Doklam-ah pawh hian a ṭul a nih chuan sipai tam zawk tirhbelh a nih tur thu a sawi. Hetih lai hian China foreign minister Wang chuan, China sipaite India ram chhungah an lut anga tarlan chu thudik lo a nih thu sawiin, India sipaite chuan ramri kana China ram chhung an luh zawk thu a sawi.
Chinese Defence Ministry chuan ram pahnih buaina hi awlsam taka chinfel theih a nih thu an sawi a, "India hian Doklam-a a sipaite hi hnukkir se la buaina chu chinfelin a awm mai dawn a ni" tiin, an website-ah an tarlang. Hetih lai hian India External Affairs Minister Sushma Swaraj chuan buaina chingfel tur hian ram pahnihte chuan an sipaite an hnuhkir ve ve a ngai tih a sawi a, inbiakna hmang buaina chu chihfel theih a beisei thu a lo sawi tawh a ni. India National Security Adviser (NSA) Ajit Doval chuan China-a a cham chhungin Chinese State Councillor Yang Jiechi chu ramri chungchanga buaina an tawh mekah inbiakna a neihpui dawn nia tarlan a a ni.
China chuan BRICS NSA Summit-ah hian Yang Jiechi leh Indian NSA Ajit Doval-te chuan ramri chungchanga inbiakna an neih tur hi Thawhṭanni khan a puang. Chinese Foreign Ministry thupuangtu Lu Kang chuan, bilateral meeting hian rah ṭha tak a chhuah China chuan a beisei tih a sawi. Hetih lai hian Defence Ministry thupuangtu Wu Qian chuan India-in a sipaite a hnukkir duh lo a nih chuan inbiakna hian awmzia a neih loh tur thu a sawi. China chuan a ram humhim turin theihtawp a chhuah zel dawn tih a sawi bawk.
Defence Ministry chuan, "Doklam region hi China territory huamchhunga awm a ni a, China sorkar chuan a ram chhungah hian kawngpui sial turin thuneihna a nei a ni. Kum 90 liam ta khan People's Liberation Army (PLA)-te chuan he hmunah hian thuneihna an lo chang tawh a, helai hmun hi tun thlengin China sorkar chuan a thuhnuaiah a la dah a ni" a ti. Hetih rual hian tun hnaia India-in China sipaite hmalakna dodal zawnga hma a la hi hriatthiam a har thu leh, pawm a harsatn thu a sawi lang bawk.
Sikkim sector-ah hian kumin June thla tir lam aṭang khan India leh China sipaite hi an lo innghirngho
ṭan tawh a, tun thlengin buaina hi chinfel a la ni lo. India-in Sikkim sector-a sipai a tirhluh hnuah buaina hi a punlun a, ram pahnih te chuan ramriah hian sipai 3,000 vel ve ve an tir lut a, ramriah hian an inep a ni. Ram pahnih sipaite ramriah an inep thu hi media-te chuan an tarlang nasa hle a, thlalak leh video clip eng emaw zat thehdarh a ni. Media-te chuan India sipaite an inhnuhkir duh loh avangin Chinasipaite chuan India ram chhunga India Army Bunker-te pawh an tichhe hial niin an tarlang.