Assam CM-in president thar lakah beiseina nei sang

Assam Chief Minister Sarbananda Sonowal chuan India president thar Ram Nath Kovind-a lakah beiseina a neih san thu a sawi a, Assam leh hmarchhak mipuite tan hmasawnna thlentu a nih ngei a beisei thu a sawi.

Assam CM Sonowal chuan, president Kovindji hian ram tan ṭha taka hna a thawh a beisei thu sawiin, a bikin hmar­chhakin hma a sawn zelna kawngah mi pawimawh tak a nih chhoh a beisei tih a sawi. Hmarchhak chuan kawng tam takah hmasawnna tur a la neih thu sawiin, hemi tihlawhtling tur hian president lakah beiseina a neihsan thu a sawi a ni.

Ram Nath Kovind hi India ram President 14-na atan Thawhlehni khan rinawmna thu tiamtira lakluh a ni a, Dalit hnam zingah President dinhmun luah thei pahnihna a ni. Lakluhna inkhawm hi Parliament-a Central Hall-ah buatsaih a ni a, Chief Justice of India JS Khehar chuan rinawmna thu a tiam tir a ni. Lakluhna inkhawm hi Assam CM Sonowal leh Assam Go­ver­nor Banwarilal Purohit-te chuan an telpui a ni.