Chowna Mein-a'n Thailand entawn a duh

Arunachal Pradesh Deputy Chief Minister Chowna Mein chuan an state economy chawisang tur chuan Thailand sorkarin tourism leh agriculture lama hma a lak anga tih ve a ṭul thu a sawi.

Deputy CM Chowna Mein hian tun hnai khan Thailand hi ni li chamin a tlawh a, Chiang Mai leh Chiang Rai province-te tlawh a ni. A cham chhung hian Thailand sorkar nen thawhhona thuthlung eng emaw zat an ziak a, heng zingah hian zirlaite tana research exchange programme kalpui tur pawh a tel a ni. Chowna Mein chuan Thailand sorkarin an ram economy chawisan nana tourism leh agriculture lama a hmalakna te chu fakawm a tih thu sawiin, hetiang hi Arunachal-ah pawh tih ve a duh thu a sawi a ni. Thailand Gross Domestic Product (GDP) 20% zet chu tourism kaihhnawih a ni.

Hetih lai hian Union Tourism Secretary Rashmi Verma leh Arunachal Chief Minister Pema Khandu-te chuan Thawhṭanni khan meeting an nei a, tourism lama hmasawnna tur kawng hrang hrang an sawidun a ni. Tourism Secretary Rashmi Verma chuan Arunachal-in tourism lama hma a sawn zel theihna tura hmalakpui a inhuam thu a sawi. Chief Minister Pema Khandu chuan a kaihhruai sorkarin tourism lama hmasawnna a ngaihpawimawh thu a sawi a, ram chhung mai ni lo khawvel huap pawha khualzin te tlawh chak ni thei tur khawpa hmunhma an neih ṭhat thu a sawi ve bawk.

Arunachal Paradesh hian kum liam ta chhung khan tlawhtu 6,598 a nei a ni.