Assam-a NH cheiṭhatna turin vaibelchhe 200 ruahman

Union Road Transport and Highways Minister Nitin Gadkari chuan Assam-a tuilianin a tih­chhiat National Highway (NH) chei ṭhatna turin cheng vaibelchhe 200 ruahman a nih thu a puang.

Road Transport and Highways Minister Gad­kari chuan, Assam-ah hian NH eng emaw zat chu tuilianin a tichhia a, a thawmṭhat hna thawh thuai a ni dawn a, hemi atan hian vaibelchhe 200 ruahman a ni, a ti. Minister chuan Brahmaputran lui mawng laih thuk belhna turin sorkar laipui chuan cheng vaibelchhe 400 a ruahman dawn tih sawiin, tuilian venna turin kawng hrang hranga hma lak a nih a nih tur thu a sawi. Hemi atan hian Brahmaputra Express Highway pawh siam a ni dawn tih sawiin, hei hi highway-cum-embankment a ni dawn a, tuilian venna atan a ṭha dawn hle a ni, a ti.

Tun hnai khan Assam Chief Minister Sarba­nanda Sonowal leh sorkar mi pawimawhte chuan Union Minitser Gadkari hi tuilian avanga chhiatna hrang hrang an tawh mekah hma lakpui turin an dawr a ni. Gadkari chuan Assam mipuite harsatna tawh mek chu a namai lo hle tih sawiin, chhiat tawkte a tawrhpui thu a sawi. Tuilianin a chim avanga hmun tam tak tlawhpawh theih loha awm chu pawi a tih thu sawiin, hei hian harstna a belhchhah hle a ni, a ti. Hetih rual hian inkalpawhna siamṭha leh tur hian theihtawp chhuah a nih tur thu a sawi bawk.

Assam-ah hian Brah­maputra lui lian avangin kumtin mi nuai chuangin harsatna an tawk a, hemi veng tur hian sorkar chuan theihtawp a chhuah a ni. Minister Gadkari chuan Brahmaputra lui mawng chu tuilian venna atan laih thuk belh a ni dawn tih a sawi a, km 600 vela laih thuk tura ruahman a ni, a ti. Hna hi kumin September aṭanga ṭan hman beisei a nih thu a sawi a, hemi atan hian cheng vaibelchhe 400 ruahman a nih thu a sawi. Hemi atan hian Detailed Project Report (DPR) pawh siam thuai tum a nih thu a sawi bawk.

Assam sorkar chuan 5,000-km express highway siamna turin Prime Minister Narendra Modi hnenah July 18 khan DPR an lo thehlut tawh bawk.