Sikkim CM-in hma lakpui turin Modi-a ngen

Sikkim Chief Minister Pawan Chamling chuan Darjeeling Hills-a Gorkha Janmukti Morcha (GJM)-te nawrh huaihawt avanga an state-in harsatna an tawh chungchangah Prime Minister Narendra Modi chu Nilaini khan a hmu a, an harsatna tawh mekah hma lakpui turin an ngen.

CM Chamling chuan GJM-te'n thla hnih dawn nawrh an huiahawt tawh avangin harsatna hrang hrang an tawk tih Modi a hrilh a, hma lakpui turin a ngen a ni. Chamling chuan an state chakkhai lamna kawngpui pawimawh National Highway (NH) 10 chu Siliguri leh a chhehvelah dan chah a ni fo tih sawiin, hei hian harsatna a thlen nasat thu a sawi. NH-ah lirthei suasam leh lirthei khalhtute kut thlakna a thleng fo a, hei hi a pawi takzet a ni tiin a hrilh. Lirthei dan a nih fo avangin nitin mamawh lakkhawm kawngah hasrtna an tawk tih a sawi a, hemi sukiang tura hma lakpui PM chu a ngen a ni.

Heng bakah hian ruahsur nasa avanga leimin vangin harsatna an tawk tih Sikkim CM chuan a sawi. Chamling chuan NH 10 dan chah a nih avangin an state chuan cheng vaibelchhe 60,000 vel zet an hloh tawh niin a sawi. Buhfai, oil leh nitin mamawh a harsa chho zel tih sawiin, an buaina chu chinfel vat a nih loh chuan harsatna nasa zawk a thlen theih thu a sawi. Hetih rual hian mipuite harsatna phuhru turin New Jalpaiguri leh Siliguri aṭangtein Bengal Police-te venna hnuaiah oil leh nitin mamawh phur truck eng emaw zat chuan Sikkim an pan ṭhin thu a sawi bawk.

Chief Minister chuan Prime Minister Modi-a chu West Bengal-ah Central military forces tam zawk dah belh tura ngenin, New Jalpaiguri, Siliguri leh West Bengal leh Sikkim inrina velah te venhimna khauh zawka kengkawh turin a ngen bawk. Chamling hian Union Home Minister Rajnath Singh leh Minister of Development of North Eastern Region, Dr. Jitendra Singh-te pawh a hmu bawk a, Gorkha Janmukti Morcha (GJM)-te nawrh huaihawt avanga harsatna an tawh hrang hranagah hma lakpui turin a ngen a ni.