Assam : Class 10 Board Exam-a zirlai pass awm lohna school 34 khar dawn

Assam sorkar chuan kumin March thlaa Class 10 state board examination neih ṭuma zirlai pass awm lohna, sorkar school 34 chu a khar dawn. Heng school 34-ah hian Class 10 zirlai hi 1,000 chuang an awm a ni.

State education minister Ranoj Pegu chuan zirlai pass awm miah lohna school tana sorkarin sum a seng ṭhin chu thil awmze nei lo a ni, a ti. "School-te tihtur pawimawh ber chu naupangtea thiamna tuh a ni. Mahse school-te hian Class 10 exam-ah an zirlai pakhat pawh an pass tir zawh loh chuan, school hawn chhunzam zel ṭulna chhan hi a awm lo," a ti. Hlawhtlinna engmah nei lo school tan sorkar chuan mipui sum chu a hmang zel thei lo a ni, tiin a sawi.

Kumina Class 10 state board examination kha kum nga chhunga result chhiat ber ṭum a ni a, candidate zinga 56.5% chauh an pass a ni. Sorkar school 34 aṭangin zirlai pass an awm lo a, hei bakah hian school 68-ah pass percentrage hi 10% an tling pha lo bawk. State sorkar chuan school tichhe zuala zirtirtute training pe tur hian IIT Guwahati faculty member-te a ngen a ni.

Official-te chuan kumin board exam result chhiat chhan hi Covid-19 hri leng nghawng zel a nih bakah, school tam taka zirtirtute chuan naupangte an ngaihsak tawk loh vang niin an sawi. School khar tura lut zirlaite hi an awmna aṭanga hnai ber high-school-ah ziah luh an ni dawn tih education official-te chuan an sawi bawk.

Minister Pegu chuan sorkar school, zirlai nei tlem lutukte pawh an bul hnai ber school nen chhunfin an ni zel dawn tih a sawi a, school enfiah mek hi 2,500 vel an awm thu a sawi.

Hetih lai hian political party hrang hrang chuan Assam sorkarin school khar a tum hi an sawisel a ni. Delhi chief minister Arvind Kejriwal chuan, "School khar ringawt hi harsatna chinfelna a ni lo. Ram chhung hmun hrang hrangah school hawn belh zel a ngai zawk a ni. School khar ringawt loin, zirna ṭha zawka kalpui a nih theihna turin thuam ṭhat leh hma lak zawk tur a ni," a ti.