AP CM eiruknaa inhnamhnawih duh lohna lantirin AAC-in km 2,140-a thui padyatra huaihawt

Arunachal Against Corruption (AAC) chuan Arunachal Pradesh chief minister Pema Khandu chu eiruknaa inhnamhnawiha puhin, an duh lohna lantirnin Itanagar-New Delhi, km 2,140-a thuiah 'padayatra' (foot march) an huaihawt.

AAC member 16-te hian New Delhi-ah prime minister Narendra Modi leh union home minister Amit Shah-te hmuh a, CM Khandu eirua an puhna te hi thlen an tum a ni.

'Padayatra' an neih ṭan hmain July 23-29 khan sit-in protest an huaihawt phawt a, August 21 khan Delhi panin Itanagar aṭangin an chhuak a, Nilaini khan Assam an thleng.

AAC president Tarh Tahar chuan an state-a sorkar department hrang hrangah Rs vbc 4,000-5,000 tihchingpen niin a sawi a, hei vang hian an state pawhin hma a sawn thei lo tih a sawi. "Arunachal Pradesh-ah eirukna a hluar hle a, state sorkar chuan hemi chungchang hi a buaipui a, min sawipui pawh kan ring a, mahse kan ngenna a ngaithah tlat a ni. July 25 khan governor Governor Brig (Retd) B D Mishra hnenah pawh memorandum kan thehlut tawh bawk a, mahse hma lakna engmah a neih zui loh avangin Prime Minister hnenah thlen turin kan rel ta a ni," a ti.

Sorkar laipui chuan an state hmasawnna atan, project hrang hrang thawhna tur fund ṭhahnem tak a pe a, mahse heng project-te hi a taka kalpui a ni lo tiin Tahar chuan a sawi. Eiruknaa CM Khandu inhnamhnawih dante hi PM Modi hnenah thlen a, inrawlh tura an ngen tur thu a sawi.