AP mite stapled visa pek chung -chang China sawipui : Sushma

External affairs minister Sushma Swaraj chuan China-in Arunachal mi leh sate hnena stapled visa a pek ṭhin leh Tibet chungchang chu China sawpui ṭhin a nih thu Rajya Sabha inkhawmah a sawilang.

Rajya Sabha inkhawmah hemi chungchanga zawhna hi chhangin, Minister Sush­ma Swaraj-i chuan, "China leh India-in level hrang hranga meetinga neih apiangin Arunachal mite hnena stapled visa pek a nih chungchang hi sawi chhuah ṭhin a ni", a ti. China-in a ram chin nia Tibet a chhala One China policy a kalpui chu an pawmsak rualin, China pawhin Arunachal Pradesh chu India ram chhung ami ngei a ni tih a pawmsak ve an duh tih a sawi a, an policy pawh hi chiang takin an hriattir tawh niin a sawi.

Sushma Swaraj-i chuan, "One China policy chungchang hi sawiho a la ni dawn a, hetih rual hian Arunachal Pradesh hi India ram chhunga awm leh, a thuneihna hnuaia awm a ni. China pawhin hei hi a pawm tur a ni a, India chu a dinna ngaiah a ding reng dawn a ni" a ti. Tun hnaia Sikkim sector-a India sipaite China-in hnukkir tura a ngen chungchanga sawiin, inbiakna hmanga chinfel tum a nih thu a sawi bawk.

External affairs minister chuan Tibetan sakhaw puithiam Dalai Lama-a'n Arunachal a tlawh chungchangah, " Dalai Lama hian vawikhat mai ni lo, vawi nga/ruk lai a tlawh tawh a, India chuan zalenna zau tak a pe a, buaina tur a awm lo" a ti. Swaraj chuan India ramah Chinese company-te tan hmun siam sak chungchangah security permission a ngai tih sawiin, China company-te aiin Japanese emaw Korean company-te duhsak zawk an nih tur thu a sawi. Indian journalist-te China-in Tibet an tlawh a phalsak lo anga tarlan chu China sorkar hnena

aṭanga hriattirna an dawn loh avangin thu chiang hriat tur a awm lo niin, minister of state for external affairs M.J. Akbar chuan a sawi ve bawk. Akbar chuan journalist-te chu mahni kea ding an ni a, Tibet tlawh phalsak an nih leh nih loh chu a hriatpui loh thu a sawiin, journalist-te leh China sorkar inkar thil a ni, a ti.

Minister Akbar chuan, kum 2014-a Prime Minister Narendra Modi leh China President Xi Jinping-te'n Astana-a inbiakna an neih ṭum khan ram pahniha mipuite chu awlsam zawka an intlawhpawhna tur te, media-te tan kawng zau zawka hawn a nih theih nana hmalak an remtih thu a sawi. Hemi tihlawhtling tur hian hma lak zel a ni dawn a, harsatna a awm a nih pawhin chingfel turin hmalak a ni zel dawn tih a sawi bawk.