JNU-ah NE hostel sakna tur lungphum phum
Union Minister of State (I/C) DoNER, Dr. Jitendra Singh chuan New Delhi-a Jawaharlal Nehru University (JNU)-ah hmarchhak zirlaite awmna tur hostel sakna tur lungphum a phum.
North Eastern Council (NEC) chairman ni bawk Dr. Jitendra Singh chuan, JNU-ah hian hmarchhak zirlaite awmna tur Barak Hostel sak a ni dawn a, hemi atan hian lungphum pawh phum fel a ni ta a, hna hi thawh ṭan nghal tura ruahman a ni a, reiloteah zawhfel beisei a ni, a ti. Hostel hi chhawng li-a sak a ni dawn a, student room, Hostel Office, Dining Hall, Common Room leh zirlaite mamawh eng emaw zat dah a ni ang. Dr. Jitendra Singh chuan hmarchhakin kawng tam takah hma a sawn chak hle tih sawiin, a bikin zirna lama a hmasawnna chu 20% lai a tling a, hei hi a sang hle tih a sawi.
JNU Vice Chancellor, Professor M. Jagadesh Kumar chuan Hostel sak a nih theih nana NEC leh Ministry of DoNER-te hmalakna chu fakawm a tih thu sawiin, hmarchhak zirlaiten an ṭangkaipui ngei a beisei thu a sawi. Hostel sakna tur lungphumna hunah hian DoNER Secretary Naveen Verma, NEC Secretary Ram Muivah bakah, hmarchhak MP panga an tel a ni.