Assam sorkarin tuilian ven-na tur kawngpui siam dawn

Assam sorkar chuan sorkar laipui ṭanpuinain Brahmaputra lui kamah tuilian venna turin High­way siam a nih tur thu a sawi.

Assam sorkar chuan Brahma­putra lui kamah kawngpui km 1,300 zeta thui siam a ni dawn a, hei hi tuilian laka mipuite himna tura duan a ni ang, a ti. Kawng­pui hi six-lane-a siam tum a ni a, hemi atan hian sorkar laipui chuan cheng vaibelchhe 400 a ruahman thu a tarlang. Brahmaputra Highway hi tuilian venna tur ngawr ngawra duan a ni dawn lo a, lui kama chengten inkalpawhna ṭha zawk an neih theih nana tih a nih thu, Chief Minister Sarbananda Sonowal chuana sawi. Sonowal chuan road-cum-embankment a ni dawn a, zawh fel a nih hunah chuan a ṭangkai hle dawn a ni, a ti bawk. Union Transport Minister Nitin Gadkari chuan Nilaini khan, Brahmaputra Highway project atana sorkar laipuiin sum a ruahman thu hi a lo puang tawh bawk.

Hetih lai hian Chief Minister Sonowal chuan tuilian avanga chhiatna hrang hrang thlenga nunna chan zingah, current man avanga mi tam tak thihna chu chhui chian a nih tur thu Ningani khana sawi. CM chuan current man avanga nunna chan mi eng emaw zat an awm hi a pawi takzet a, a chhan chhui chiang turin Gauhati High Court-a Justice HN Sarma kaihhruaina hnuiaha chhui chuiang tur team din a ni, a ti. Assam Power Distribution Com­pany Ltd (APDCL)-a thawjtute inthlahdah vanga thleng a ni em tih chhuichian a ni dawn a, he thil thleng hi a pawi takzet a ni, a ti. APDCL thupuangtu chuan, current-in a man hlum nia sawi mi tam tak an awm tih sawiin, an chhungte biak an ni tawh a, mahse thi zat nia tarlan hi finfiahna a awm loh thu a sawi.

Tarlan dan chuan mi 30 vel chu current hian a man hlum a ni. Mahse hei hi finfiah vek a la ni lo tih APDCL offial-te chuan an sawi a, chutiah rualin nunna chan chhungte an tawrhpui thu an sawi. Chief minister Sonowal chuan Power Department-a thawktu indaih lohna chu hnawhkhah a ni thuai dawn tih sawiin, thawktu mi 3,000 vel lak belh an ni ang, a ti.