India-Bangladesh-te'n MoU ziak dawn

India leh Bangladesh sorkar aiawhte chuan Ningani khan Meghalaya khawpui Shillong-ah sai humhalh kawnga thawk dun turin inbiakna an nei a, Thawhdunna ṭha zawk nei turin Memorandum of Understanding (MoU) an ziak dawn nia tarlan a ni. He hunah hian Assam, Meghalaya, West Bengal leh Tripura aṭangtein Forest official ṭhahnem tak an tel a, Bangladesh sorkar aiawhin mi 12 an tel bawk. International border paltlanga hmun hrang hranga sai pemkual ṭhin chungchang sawiho a ni a, an himna tura hmalak ho an rel a ni.

Inbiaknaah hian sai eng emaw zat chu ramri kanin an chetla ṭhin tih tarlan a ni a, hei hian mihringte tana harsatna a thlen lohna turin hmalak an rel bawk. Palaite chuan an chenna hmun a chereu zel avangin kum tin sai 400 vel an thi ziah niin an sawi a, an khawsakna hmun tur leh an ei leh intur ngaihtuah kawngah thawhho an rel a ni. Hemi chungchangah hian ram pahniha aiawhte chuan Kolkata-ah inbiakna an lo nei tawh a, inrem eng emaw zat ziah a lo ni tawh a ni. Bangladesh sorkar chuan sai pem ṭhinte humhalhna kawngah hma lain, an ei tur pawh thing nuai sarih vel zet chu, ram hectare 600 zeta zauah a ching a ni.

Bangladesh Chief Conservator of Forest, Md Shafiul Alam Chowdhury chuan inbiakna hian rah ṭha a chhuah ngei a beisei thu sawiin, kawng hrang hranga thawhhona ṭha zawk nei turin MoU pawh ziahfel thuai a beisei thu a sawi.