Manipur CM-in hrileng vangin emergency meeting a ko

Manipur Chief Minister N Biren Singh chuan an state-a Japanese Encephalitis (JE), H1N1 (Swine Flu) leh dengue darh zel chung­chang ngaihtuahin emergency meeting a ko.

Meeting hi CM Secretariat-ah neih a ni a, Health and Family Welfare minister L. Jayantakumar Singh, Agriculture minister V. Hangkhanlian, Hill Areas Committee chairman T.T. Haokip, Chief Secretary R.R. Rashmi, DGP L.M Khaute, Secretary (Health) Sumant Singh, Director (Health) K. Lokendro, Director (RIMS), Director (Ayush), Director (JNIMS) leh specialist doctor-te an tel a ni. Meeting-ah hian tun hnaiah JE, H1N1 leh dengue-te a darh zel nia tarlan a ni a, hemi venna kawnga hmalak dan tur an sawiho a ni. Chief minister chuan heng natna te hi a darh zel loh nan state sorkar chuan theihtawp a chhuah zel tur thu a sawi.

Manipur-ah hian tun dinhmunah dengue vei mi 59 hmuhchhuah tawh a ni a, JE vei mi 73 an awm bawk. Hri vei hi an punbelh zel loh nan state sorkar chuan hma a la mek a, doctor 20-30 vel chu a vei tamna Churachandpur-ah tirh a ni ang. Chief Minister chuan a thlawna damdawi sem a nih tur thu sawiin, hemi atan hian Finance Department chuan cheng vaibelchhe 10 a ruahman tih a sawi. Heng sum hmang hian JE, H1N1 leh dengue darh mek veng turin hma lak a ni ang, a ti. Hmun hrang hrangah detection centre siam a ni dawn tih sawiin, Moreh, Behiang leh Jiribam-ahte beihpui thlak phawt a ni ang, a ti bawk.

Assembly session-ah pawh hri leng mek chungchang hi sawi lan a ni a, Health Minis­ter L.Jayentakumar chuan Health department hmalakna hrang hrangte House-ah a tarlang a ni. Minister L.Jayentakumar chuan tun hnaiah Churachandpur district-a Henglep Sub-division huam chhunga H1N1 vei hmuhchhuah an awm leh tak thu a sawi a, heng hmunah te hian doctor pahnih tirh nghal an nih thu a sawi. Hemi chungchanga opposition MLA K Ranjit Singh-a zawhna chu chhangin, H1N1 vei hmuhchhuah thar a nih vangin nasa zawkin sorkar chuan hma a la dawn a, mipuite chu chiai lo turin ngen an ni tih a sawi. Tun dinhmunah H1N1 vei hi mi 41 an awm tih sawiin, an zinga 31 chu naupang an ni a, heng mite hi Churachandpur District Hospital-ah enkawl an ni, a ti bawk.

Health minister chuan JE, H1N1 leh dengue veite enkawlna tur bik Jawaharlal Nehru Institute of Medical Sciences (JNIMS) leh Regional Institute of Medical Sciences (RIMS) Imphal-ahte ruahman a nih thu a sawi.