Nagaland by-election-ah vote a tla ṭha

Nagaland-a Northern Anga­mi-I constituency by-election-ah vote 78% tlain, vote tla te hi August 3-ah chhiar a ni ang.

Northern Angami-I consti­tuency-ah hian vote nei mi 16,235 an awm a, vote hi Inrinni khan thlakin tlai dar li thleng thlak a ni. Returning Officer Rajesh Soundararajan chuan mipuiten boruak ralmuang tak hnuaiah vote an thlak tih sawiin, dan kalha chetna thleng report a awm loh thu a sawi. Soundararajan chuan polling station 25-ah Voter Verifiable Paper Audit Trail (VVPAT) hman a ni a, hetih rual hian T. Khel Upper leh L. Khel Upper-ahte chuan VVPAT hi khawl lamah buaina a awm avangin thlak a nih thu a sawi.

NPF legislator Khriehu Liezietsu chuan May 24 khan Angami-I bial hi a chhuahsan a, a pa Shurhozelie Liezietsu tan hmun a kian a ni. Shurhozelie Liezietsu hi Naga People’s Front (NPF) president niin, T.R Zeling-a'n banna a thehluh hnuah chief minister atan lakluh a ni. By-election a hmachhawn hmain Liezietsu hian chief minister aṭanga paihthlak ve leh a ni. Paihthlak an nih chhanah hi Liezietsu hian a fapa Khriehu chu financial adviser atana ruat a, cabinet minister status pein minister te hlawh ang a pek vang nia sawi a ni. Hei hi NPF legislator-te chuan nasa takin an dodal a, CM chuan a laka lungawi lo eng emaw zat chu a minister an nihna aṭangin a ban a, MLA eng emaw zat suspend an ni bawk.

Hetih lai hian TR Zeliang chu a ṭum hnihna atan July 19 khan chief minister atan rinawmna thu tiam tira lakluh a ni. Zeliang hian thlawptu 47 a nei a, a kaihhruai sorkar thar a ding ve leh ta a ni. Zeliang hi NPF MLA 36, BJP pali leh Independent MAL pasarih ten an thlawp a ni. He thil thleng avang hian NPF chuan an party mi leh sa 20 vel an suspend a, an zingah hian Chief Minister Zeliang bakah, MLA 10 an tel a ni.

NPF president Liezietsu chuan by-election-ah hian an party hruaitu eng emaw zat chu dan kalhin an che niin a sawi a, mahse eng thil mah a sawi chian loh tur thu a sawi. Liezietsu hi Nagaland assembly-ah ṭum riat lai thlan tlin a lo ni tawh.

Hetih lai hian by-election neih hma ni, Zirtawpni khan Nagaland Pradesh Congress Committee (NPCC) chuan Special Leave Petition an thehlut a, hemi chungchang hi Supreme Court chuan Election Commission of India (ECI) a hriattir ve nghal. NPCC chuan inthlan chungchngah hian thil dik tawk lo a awm nia sawiin, Supreme Court-ah Special Leave Petition hi an thehlut tih an sawi. EC chuan hemi chungchngah hian thuchhuah a la siam lo thung.