Assam vigilance team-in thamna latu official an man leh

Assam sorkarin eirukna umbo tuma hma a lakna kal zelah, Assam vigilance and anti-corruption team chuan ni thum chhungin sorkar hnathawk, thamna latu pathum an man.

Ningani khan Dhemaji-a district transport officer (DTO)-a senior assistant chu thamna a dawng lai anti-vigilance team hian an man a ni.

E-rickshaw dawr pakhat chuan trade certificate renew dawnin senior assistant Gobin Bordoloi hian Rs 12,000 pe turin a phut tih a sawi a, complaint a thehlut a ni. Hemi hnu hian vigilance and anti-corruption chuan thamna phuttu official hi man tumin thang an kam zui a ni. Complaint thehluttuin official hnenah a sum phut a pek veleh vigilance team hian luhchilhin a sum dawn nen hian an man ta a ni. Prevention of Corruption Act, 1988 (as amended in 2018) hnuaiah Anti-Corruption Bureau (ACB) police station-ah thubuai siamsak nghal a ni bawk.

Nilaini khan Biswanath-ah sub-registrar office-a extra writer chu land registration tihfel sakna thamna sum a dawng lai man a ni a, Thawhlehni khan Morigaon district-ah Hatwmoria MV School head teacher chu service book update-na tura thamna a dawng lai man a lo ni tawh bawk a ni.

Kum 2021, May 10 aṭang khan sorkar deparmtent hrang hrangah officer leh thawktu 41-te chu thamna an lak avangin man an lo ni tawh a, an mi man zinga hmun thuma ṭhena hmun hnih chu thubuai siamsak an ni tawh bawk.