RSS hotu Mohan Bhagwat-a'n Tripura a tlawh

Rashtriya Swayam­sevak Sangh (RSS) hotu lu ber, Mohan Bhagwat chu nimin khan ni hnih cham turin Tripura-ah a zin.

Mohan Bhagwat hi Gomati district-a Sarbong hmuna Shantikali Ashram temple hawng tura zin a ni a, kumina Tripura a tlawh ṭum hnihna a ni. A cham chhung hian vantlang inkhawmah thu a sawi dawn a, state BJP hruaitute nen meeting an nei bawk ang.

Shantikali Ashram hi Shantikali Mission Society hnuaiah awmin, society hian state chhunga temple 24 a enkawl mek a ni.

BJP national president JP Nadda pawhin August 28 hian ni hnih cham turin Tripura a tlawh dawn bawk. BJP President hi state BJP hruaituten MBB Airport, Agaratala-ah hmuakin, heta ṭang hian Tripurasundari temple a pan nghal dawn niin CM hlui Biplab Kumar Deb chuan a sawi.

JP Nadda hian an party dinhmun leh hmalak dante enin, state party hruaitu hrang hrangte chu meeting a neihpui dawn a ni. August 29-ah Krishnanagar-a state party headquarters-ah press conference a nei ang, hemi hnu hian political rally buatsaihah a tel leh ang.

Tripura-a Nadda a cham chhung hian Trinamool Congress president Subal Bhowmik leh MLA hlui Prakash Das chu BJP-ah lawmluh an ni dawn nia sawi a ni.