Assam-ah thla 2 chhungin JE vangin mi 85 thi

Assam state-ah thla hnih chhungin Japanese Encephalitis (JE) vangin mi 85 an thi tih state health department chuan a tarlang. Ni kua kalta chhung khan mi 10-in an thihpui a ni.

Kumin July thla thla aṭang khan JE vei hi mi 390 hmuh an nih thu health department bulletin, Inrinnia tichhuah chuan a tarlang. Hri vei hi an pun chhoh avangin state sorkar chuan July thlakhan District Rapid Response Team pawh a lo din tawh a ni.

Official-te chuan hri darh zel tur venna atan leh, hri kaite rang zawka hmuhchhuah an nih theihna atana National Heatlh Mission, Assam-in kaihhruaina a siamte chu ṭha taka zawm a nih thu an sawi. State chhunga medical college pakua leh, district hospital 10-te chu JE treatment centre atan ruat a ni tih an sawi bawk.

JE hi thosi seh aṭanga kai theih niin, thluak infection a thlen a ni. He hri hi vawk leh sava-ahte hmuh a ni a, heng hri paitu rante hi thosiin a seh chuan a hri hi kaiin, mihring a sehah a kaichhawn leh thei a ni.