Nagaland-AP inkarah khualzin phur rel service ṭan

Nagaland-a Shokhuvi Railway Station leh Arunachal Pradesh-a Naharlagun Railway Station inkarah a vawi khatna atan khualzin phur rel tlan tir a ni.

Nagaland chief minister Neiphiu Rio chuan Zirtawpni liam ta khan khualzin phur, Donyi Polo Express hi a vai liam a, Nagaland tana ni chhinchhiah tlak tak a nih thu a sawi. Chief Minister chuan, "Kum 100 chuang hnuaha Nagaland chuan railway terminal passenger service pahnihna kan nei leh thei ta a ni," a ti. He rel service thar hi Nagaland leh Manipur mipuiten an chhawr ṭangkai tur thu sawiin, Nagaland-a an thlai thar phurh chhuahna kawngah pawh a ṭangkai dawn a, state economy hmasawnna thlengin a pui thei dawn tih a sawi.

15817/15818 Donyi Polo Express hi Guwahati-Naharlagun inkara tlan ṭhin niin, Shokhuvi thleng hian tlantir a ni tawh dawn a ni. He relah hian first AC cum Ac-2 tier pakhat, AC-2 tier pakhat, AC-3 tier pathum, sleeper class pariat, general second class coach pahnih leh brake, luggage cum generator car pahnih a awm.