Vawiinah PM Modi-a'n Assam a tlawh dawn

Prime Minister Narendra Modi chuan vawiin hian Assam a tlawh dawn a, tuilian vanga chhiatna thleng hrang hrang te a hmunah kalin a enfiah dawn a ni.

Prime Minister Office chuan Assam Chief Minister Sarbanada Sonowal-a sawmna anga Modi-a'n Assam a tlawh tur thu hi kar kalta Inrinni khan a puang. PM Modi chuan Assam-a tuilian tuarte a tawrhpui thu hi a lo sawi tawh a, thi chhungte hnenah cheng nuai hnih ṭheuh pek a nih tur thu leh, hliam tuarte pawh cheng 50,000 ṭheuh pek an nih tur thu a sawi a ni. Ṭanpuina sum hi Prime Minister National Relief Fund (PMNRF) aṭanga pek a ni ang.

Assam CM Sonowal chuan harsatna an tawh chungchangah hian July 18 khan Prime Minister hi New Delhi-ah a lo hmu tawh a, tuilian avanga harsatna an tawh hrang hrangte thlenin, hma lak pui turin a ngen a ni. Hemi ṭum hian Sonowal hian PM hi an state tlawh turin a sawm a, a sawmna hi Modi chuan a tihlawhtling dawn ta a ni. Modi hian a cham chhung hian Chief Minister bakah, sorkar mi pawimawhte meeting a neihpui bawk ang.

Hetih lai hian member pasarih awmna inter-ministerial Central team-te chuan Assam hi kar liam ta khan an lo tlawh tawh a, ni thum an cham hnuah Zirtawpni khan Assam hi an chhuahsan a ni. An cham chhung hian district hrang hrang an tlawh a, tuilian avanga chhiatna thleng hrang hrang zirchianna an nei a ni. Zirchianna report hi sorkar laipuiah an thehlut leh ang.

Assam-ah hian district 29-a cheng mi nuai 25 vel zetin tuilian vang hian harsatna an tawk a, chenna nei lo te tan relief camp leh distribution centre 1,098 sak a ni. Tun din hmunah district parukin tuilian hi an la tuar a, mi 2,000 vel chu relief camp-ah an la khawsa a ni. Governor Banwarilal Purohit chuan tuilian tuarte ṭanpui nan hian a thla hlawh chu Chief Minister's Relief Fund-ah a lo pe tawh bawk. Tuilian vanga nunna chan hi mi 79 an tling tawh a, inkalpawhna leh inbiakpawhna pawh a buai nasa hle. Lakhimpur district chu a tuar nasa ber niin, mi 11-in nunna an chan tawh a ni.