Manipur-ah thosi seh avangin mi 20 an thi tawh
Manipur Health Minister L. Jayentakumar chuan tun hnaiah thosi seh avanga natna hrang hrang vangin mi 20 an thi tawh tih Pathianni khan a sawi.
Minister L. Jayentakumar chuan thosi seh avanga natna Malaria, Dengue leh a dang chi hrang hrang avangin tun hnaiah mi 20 an thi tawh tih sawiin, India-Myanmar border-ah nunna chan an tam thu a sawi. Ramri depa khaw hrang hrangah mi 16 an thi tawh a, hmun dangah nunna chan pali an awm tawh bawk. Minister chuan tun hnaiah Japanese Encephalitis (JE) kai thar an awm leh thu sawiin, state sorkar chuan hma a lak nghal thu leh, a darh zel loh a beisei thu a sawi. Ramri leh a chheh velah hri leng a tam tih sawiin, heng laia chengte tan fimkhur a ṭul thu a sawi bawk.
Hetih lai hian Chief Minister N. Biren Singh chuan Japanese Encephalitis (JE), H1N1 (Swine Flu) leh dengue darh zel chungchang ngaihtuahin emergency meeting a ko. Chief minister chuan Churachandpur District-ah thosi seh avanga natna chi hrang hrang kai mi 200 vel an awm thu a sawi a, a darh zel loh nan theihtawp chhuaha hma lak a ṭul thu a sawi. Churachandpur District-a Henglep khuaah chuan tun hnai khan JE, H1N1 leh dengue-te hi a darh thu sawiin, mi 100 chuang chu enkawl turin Hospital-ah admit an ni, a ti. Churachandpur-ah hian doctor 15 leh paramedic 30 tirh nghal an nih thu a sawi bawk.
Medical team-te hian Pathianni khan Churachandpur hi an thleng a, damlo enkawl hna thawkin, a la kai ve lote an him theih nan hma an la nghal bawk. Heng natna avang hian tun hnaiah nunna chan report a awm nual a, swine flu vei pawh hmuh chhuah thar a ni a, Guwahati-ah inenkawl tura thawn a ni. Manipur-ah hian tun dinhmunah H1N1 vei hi mi 41 an awm tawh a, an zinga 31 chu naupang an ni. Churachandpur District chu a vei tamna ber a ni a, JE, H1N1 leh dengue veite enkawlna tur bik Jawaharlal Nehru Institute of Medical Sciences (JNIMS) leh Regional Institute of Medical Sciences (RIMS) Imphal-ahte ruahman a ni. Manipur-ah hian tunhma pawhin Japanese Encephalitis (JE) hi a lo leng tawh ṭhin a, kumin kum tir lam pawh khan a vei hmuh chhuah a lo ni tawh bawk.