ONGC Tripura-in Gas tam zawk lak chhuah beisei

Tripura Oil and Natural Gas Corporation Limited (ONGC) chuan gas tam zawk lak chhuah an inbeisei a, hemi tur hian fertilizer plant tam zawk din a nih tur thu an tarlang.

ONGC Executive Director S.C. Soni chuan, Tripura-ah hian gas tam zawk la chhuak turin hma lak a ni a, gas khur pawh pasarih an neih tawh thu a sawi. ONGC hian kum 2016 September thla kha chuan khur hi pathum chiah an la nei a, tunah chuan pasarih an nei tawh a ni. Soni chuan ni khatah gas MMSCMD (Million Metric Standard Cubic metre per day) nga zel la chhuak thei turin hma lak ni a, hei hi kum 2018-ah chuan a hlawhtlin hman beisei a ni, a ti. ONGC hian fertilizer plant din nan cheng vaibelchhe 5,000 an ruahman a ni. Hetih lai hian ONGC, Tripura sorkar leh Rajasthan company Chambal Fertilizers and Chemicals Ltd.-te thawhhona chu nimin khan a tawp a, kum 35 chhung zet an thawkho hman a ni.

An thawhho chhung hian khur 223 an verh hman a, khur 116-ah gas a awm a ni. ONGC hian khur tam zawk verh leh turin ruahmanna a siam a, hemi atan hian cheng vaibelchhe 3,104 a ruahman. Company hian India rama commercial power project hmasa ber chu southern Tripura-ah an lo hawng tawh a, Tripura sorkar leh Infrastructure Leasing and Financial Services Ltd (IL&FS)-te nnen ṭangkawpin ONGC Tripura Power Co (OTPC) an din a, power Megawatt 726 an pe chhuak mek a ni. Power hi tui leh gas chakna hmanga siam chhuah a ni a, hmarchhak state pasarih leh, ṭhenawm ram Bangladesh-ahte MW 100 an pe chhuak bawk.