Sorkar laipuiin ramri depa kawngpui 519 chei ṭha mek

Sorkar laipui chuan ramri depa inkalpawhna kawngpui chei ṭhat hna chu thawh mek a nih thu kar kalta Zirtawpni khan a tarlang a, heng zingah hian hmarchhak state Arunachal Pradesh leh Sikkim a mi pawh a tel a ni.

Sorkar thuchhuah chuan border area-a kawngpui 519 zet chu chei ṭhat mek a ni a, a vaia a thui zawng hi km 22,225 a ni, a ti. Minister of State for Defence Subhash Bhamre chuan kawngpui chei ṭhat hna thawh mek a nih thu hi Lok Sabha-ah a sawi chhuak a, project hi state 14-ah kalpui a nih thu a sawi. Ramri chungchanga buaina chhuah zinna state - Jammu and Kashmir leh Arunachal Pradesh-ahte kawngpui chei ṭhat hna hi ngawrh taka kalpui a ni a, heng hmunah te hian kawngpui km sing khat chuanga thui thawm ṭhat mek a ni. J&K-ah hian km 7,122 zeta thui siam hna thawh a ni a, AP-ah pawh km 5,267-a thui chei mek a ni bawk.

Minister Bhamre chuan project hi kum nga chhung atan duan a nih thu sawiin, kum 2015 khan ṭan a ni a, 2020-ah zawh fel beisei a ni, a ti.Tun hnaia China leh India sipaite inepna Sikkim-ah pawh kawngpui siam ṭhat hna hi ngawrh taka thawh a ni a, kawngpui 37 chu chei niin, a vaia a thui zawng hi km 910 a ni. Minister chuan he project hi ram venhimna tura ruahmanna a nih thu sawiin, railway line pawh theih anga chei ṭhat a nih thu a sawi bawk.