ENPO-in state hran pek hma inthlanah tel an tum tawh lo

Nagaland khawchhak lam bial state hrana siam phuttu, Eastern Nagaland People's Organisation (ENPO) chuan state hran, Frontier Nagaland pek an nih hma chu state leh central election neihnaah an tel ve tawh dawn lo tih an sawi.

ENPO, tribal body leh organisation dang hruaitute Dimapur-a joint consultative meeting an neihah lungrual takin resolution hi an siam a ni.

Nagaland state khawchhak lam bialte hian hunrei tak 'Frontier Nagaland' state hran siam an lo phut tawh a, an bial chu state sorkarin a ngaihsak tawk lo a, hmasawnna hrang hrangah an hnufum bik a, zirna leh infrastructure lam thleng pawhin ngaihsak an hlawh ve lo niin an sawi. Hei vang hian an bial hmasawnna tur chuan state hran siam a ngai tih an sawi a, kum 2010 aṭang khan state hran siam hi an lo phut tawh a ni. Kumin August 9 khan an thil phut hian rally an lo huaihawt bawk.

ENPO-in state hran siam tura an phutna hi an state khawchhak lama district paruk - Kiphire, Longleng, Mon, Noklak, Sharmator leh Tuensang niin, Nagaland assembly seat 60 zinga seat 20 a awm a ni. Heng bialah hian rorellai, Democratic Progressive Party (NDPP) chuan seat 15 nei mekin, an thawhpui BJP-in seat pali leh independent MLA pakhat an awm bawk.

Nagaland assembly inthlan hi nakkum kumtir lamah neih a ni ang. State assembly-ah hian NPP hian MLA 42 neiin, BJP-in 12, Naga People's Front-in pali leh independent MLA pahnih an awm a ni.