Meghalaya Assembly inthlanah NPP-in BJP thawhpui tum lo

Meghalaya-a rorellai, National People's Party (NPP) chuan an state assembly inthlan awm turah party dang thawhpui loin, party malin an ding dawn tih NPP president leh Meghalaya chief minister Conrad K Sangma chuan a sawi.

Conrad Sangma chuan party dang tumah, BJP pawh tiamin an thawhpui dawn lo tih a sawi a, mahse center-a BJP kaihhruai National Democratic Alliance (NDA)-ah erawh chuan NPP chu a awm chhunzawm zel dawn a ni, a ti.

Meghalaya assembly inthlan hi nakkum March thla-ah neih tura ruahman a ni.

Shillong-a party national conference an neih zawha chanchinthar lakhawmtute a kawmnaah, Sangma chuan state dangah pawh an party chuan inthlan hmain thawhpui turin party dang inremna a siampui ngai lo tih a sawi.

Assembly inthlan hmabak, Odisha leh Chhattisgarh-ah pawh NPP chuan party mala a chuh tur thu a sawi a, hemi rual hian hmarchhak state - Meghalaya, Nagaland, Tripura, Mizoram leh Arunachal Pradesh-a inthlan neih turah insawrbing zual an tum tih a sawi bawk.