Oct aṭangin Churachandpur Medical College-ah class kal ṭan dawn

Manipur health minsiter Sapam Ranjan chuan Churachandpur Medical College siam thar chu chief minister N Biren Singh-a'n a hawn dawn thu leh, October thla aṭangin class pawh kal ṭan a ni dawn tih a sawi. Pathianni khan Minister hian college hi a endik a ni.

Churachandpur Medical College-ah hian MBBS seat 100 a awm thei dawn a, Medical Council of India (MCI) pawhin a pawmpui tawh a ni.

College a endik hnuah media mite a kawmnaah, Health Minister chuan an state-in medical college an nei belh leh tur chu lawmawm a tih thu a sawi a, Churachandpur Medical College chu Manipur-a hill district ho zinga medical college hmasa ber tur a nih thu a sawi. College hawn hunah pawh duhthusam angin thil a awm thei nghal vek dawn lo a, zirtirtu lamah pawh indaih lohna a awm dawn a, junior faculty member-te chuan theihtawp an chhuah a ngai a, mipuite pawhin an ṭawiawm ṭhat a ngai dawn a ni, a ti.

Health Minister kaihhruai team hian college-a room hrang hrang, dissection hall, clinical physiology lab, histology practical hall, seminar cum library hall, anatomy museum, professor room, classroom leh a dangte an endik a ni.