PM Modi-a'n Assam a tlawh

Prime Minister Narendra Modi chuan Thawhlehni khan Assam a thleng a, tuilian avanga chhiatna hrang hrang thlenna hmun a tlawh kual.

PM Modi hi Lokopriyo Gopinath Bordoloi International Airport-ah Governor Banwarilal Purohit leh Chief Minister Sarbananda Sonowal bakah, sorkar mi pawimawh eng emaw zatin an lo hmuak a ni. Modi hi Bordoloi International Airport aṭangin helicopter hmangin Veterinary College Ground, Khanapara panpui a ni a, heta ṭang hian tuilian avanga harsatna thlenna hmun hrang hrang fanpui a ni. Hemi hnu hian Assam Administrative Staff College-ah sorkar mi pawimawhte nen meeting an nei a, Assam-in kum tina tuilian avanga harsatna a tawh ṭhin venna tura ruahmanna te an sawiho a ni. Assam-a tuilian hi National Disaster-a puan rawtna a lo awm tawh a, hemi chungchangpawh hi an sawiho rin a ni. Heng bakah hian vanduaina tawkte chhawmdawlna pek dan tur pawh an sawiho bawk.

Prime Minister hian BJP thawhpui party - Asom Gana Parishad (AGP) leh Bodo Peoples' Front aiawhte inbiakna a neihpui a, BJP kaihhruai sorkar hmalakna hrang hrangte an thirho a ni. Modi hian Arunachal Pradesh, Manipur, Nagaland leh Assam chief minister-te chu meeting a neihpui bawk.

Assam finance minister Himanta Biswa Sarma chuan Modi-a'n an state a tlawh chu lawmawm a tih thu a sawi a, harsatna tawk mi tam takin an thlamuanpui ngei a beisei thu a sawi. Sorkar laipui chuan Modi-a'n Assam a tlawh hma lawk hian tuilian avanga chhiatna tawk, a bikin, nunna chan chhungte chu cheng nuai hnih ṭheuh pek an nih tur thu leh, hliam tuarte pawh an inenkawlna turin cheng 50,000 ṭheuh pek an nih tur thu a sawi. Hei bakah hian loneitu, an thlai chin tuilianin a tihchhiatsak te leh, chenna-in chhiate ṭanpuina tur sum ruahman sak an nih tur thu puan a lo ni tawh bawk.