Nagaland CM thlawptuten NPF president bang turin an phut

Nagaland Chief Minister T.R. Zeliang-a thlawptu Naga People’s Front (NPF) legislator 35-te chuan, an party president Dr. Shurhozelie Liezietsu chu bang tura an phut thu Thawhṭanni khan an sawi.

NPF MLA 35-te chuan Zeliang an thlawp thu an sawi rualin, an party president Lie­zietsu chu bang turin an phut tih an sawi a, ni 15 chhunga banna thehlut turin an ngen tih an sawi. Liezietsu-a chu NPF party-ah thuneihna uchuak taka hmangah puhin, a chetdan chu an dem takzet thu an sawi. Parliamentary Affairs Minister Tokheho Yepthomi chuan, "NPF party mi leh sa te chuan president thupek hi kan zawm tur a ni lo a, amah zawk hi party kalphung pela che a nih avangin a bang zawk tur a ni" an ti. Hetih rual hian chief minister ṭum thum lo ni tawh leh, Nagaland Lok Sabha MP ni lai, Neiphiu Rio chu party president atan an duh thu an sawi.

T.R Zeliang-a hi July 19 khan chief minister atan lakluh a ni a, Dr. Liezietsu-a a thlak a ni. Chief minister hlui Dr. Liezietsu-a hi a fapa chungah uchuak taka duhsakna lantirah puhin, minister leh MLA eng emaw zat chuan an phatsan a, chief minister a nihna aṭangin an paihthla zui bawk. Liezietsu laka helte hian T.R Zeliang-a an thlawp a, sorkar thar an din zui a ni. Zeliang-a hian Assambly House-ah sorkar thar din turin thlawptu a ngah tawk tih fiahin floor test a paltlang a, NPF MLA 35, BJP pali leh Independent MLA pasarihin an thlawp a ni.

Hetih lai hian NPF chuan party kalha cheah puhin, chief minister Zeliang-a leh MLA 20-te chu party aṭangin a hnawtchhuak a, midang 10 pawh susupend a ni. Zeliang-a hi kum ruk chhung atan hrem a ni a, party thil tihah a inhnamhnawih an remti lo a ni.