Nagaland-in state ramri khar chhunzawm dawn

Assam sorkarin nimin aṭang khan Sikkim tel loin, hmarchhak state dang nena an ramrite hawng mah se, Nagaland sorkar chuan ramri an la khar chhun­zawm zel dawn tih a sawi. 

Chief minister Temjen Toy chuan state ramrite chu an khar chhunzawm leh dawn tih sawiin, red zone chhunga awmte chu an state-ah luh an la remti dawn lo tih a sawi. Green leh orange zone a awmte tan erawh ngaihnathiamna siam a ni ang, a ti. 

Toy chuan green zone aṭanga luh chu phalsak dawn mah se ramri an hawng tihna a ni lo tih sawiin, orange zone aṭanga luh tumte tan ruahmanna siam mek a nih thu a sawi. An state aṭanga kalchhuah tumte chu phalsak an ni thung. 

Assam chuan an state-a hmarchhak mi tangkhang mekte an haw theihna turin nimin aṭang khan Sikkim telloin hmarchhak state dang ramri chu a hawng vek a ni. Hmarchhak state danga haw turte tan hian phalna lak hran a ngai lo a, state dang aṭanga Assam-a hawte chu ramri-ah screening neihsak vek an ni dawn tih Assam health minister Himanta Biswa Sarma chuan a sawi.