Manipur sorkarin hel inpete hamṭhatna pek tipung

Manipur sorkar chuan an state-a hel pawl hrang hrang, sorkar kuta inpete hnena hamṭhatna a pek a ṭhin chu tihpun a nih thu Assambly session-ah tarlan a ni.

Hemi chungchang hi budget session neih mekah opposition member-te'n sawichhuakin, minister Karam Shyam chuan sorkar kuta inpete hnena ṭanpuina pek ṭhin chu tihpun a nih thuin a chhang a ni. Minister chuan hemi chungchang hi May thla khan cabinet meeting chuan a lo ngaihtuah tawh tih sawiin, lungrual taka pass a ni. Hel inpete hnena thla tina stipend pek ṭhin chu cheng 8,000-ah tihpun a ni a, sorkar kuta an inpek avanga an intunnun nan ṭanpuina pek ṭhin pawh cheng nuai li-ah tihpun a ni, a ti. Hetihrual hian state sorkar chuan ministry of Home Affairs pawmpuina a nghak mek a, tunah chuan hei hi a taka hman a la nih loh thu a sawi bawk.

Manipur sorkar chuan hel inpete hnenah hian thla tin stipend cheng 4,000 a pe mek a, sorkar kuta an inpek avangin cheng nuai 2.5 a hlan ṭhin bawk. Mahse heng ṭanpuina sum hi sorkar kuta an inpek aṭanga kum thum hnuah, an account-ah thunsak chauh ṭhin an ni. Tun dinhmunah sorkar kutah hel mi 584 an inpe tawh a, an zinga mi 407 te chu sorkar nena inremna thuthlung, Memorandum of Understanding (MoU) ziah a nih hnua inpe te an ni. Hel inpete hi mumal taka training pek ṭhin an ni a, an intunnunna tur ngaihtuah sak ṭhin niin, hel inpe zinga 396 chuan vocational training an zo tawh a ni.

Minister Karam Shyam chuan hel inpete intunnunna tur sum hi rehabilitation policy hnuaiah sorkar laipui aṭanga dawn a nih thu a sawi. Kawng hrang hrangin an hamṭhatna tur ngaihtuah sak an nih thu sawiin, state force-ah mi 40 an lut tawh tih a sawi bawk.