Assam-Nagaland border: CM Rio-a'n border district meeting a ko

Nagaland chief minister Neiphiu Rio chuan Assam nena ramri buaina an neih mek chinfel dan ngaihtuah leh, zirchiang turin September 1-ah border district committee meeting a ko.

Chief Minister hi state assembly-in ramri buaina chungchang buaipui tura a din, select committee hotu a ni. Meeting hi select committee member leh, border district - Mon, Longleng, Mokokchung, Wokha, Tseminyu, Niuland, Dimapur leh Peren-a local committee member-ten an nei dawn a ni.

State pahnihte hian ramriah intihthiam lohna an nei fo a, nikum June thla khan Assam police-ten Mokokchung district-a Tzurangkong range huam chhung, Vikuto khuaa camp siam an tum avangin buaina a lo chhuak tawh a ni. He thil thlen hnu hian state pahnih chief secretary-te chuan Mokokchung, Nagaland leh Jorhat, Assam-a superintendent of police-te chu ramri aṭanga an police-te hnuhdawh tir tur leh, boruak muanawm siam tura hma la turin a lo ti a ni.

Assam leh Nagaland chief secretary-ten Dessoi Valley Reserved Forest leh Tsurangkong valley border-ah boruak ṭha a awm theihna tura inremna an siam hnuah, state pahnihte hian ramria buaina an neihna hmunte chu unmanned aerial vehicle (UAV) leh satellite imagery hmanga enfiah an remti bawk.

Nikum July thla khan Nagaland Legislative Assembly (NLA) member-te chuan ngun taka an sawiho hnuah, Assam nena hun rei tak ramri buaina chinfel a nih theih dan ngaihtuahin, lungrual takin point pathum awmna resolution an pass a ni.

Resolution-a point an tarlan zinga pakhatah chuan state pahnihten ramri buaina an neih chu court inrawlh ngai loin, court pawn lamah chinfel ni se, an ti. Hemi hnu hian ramri dinhmunte zirchiang turin Selection Committee an din zui bawk.

Select Committee hi CM Rio chuan kaihruaiin convenor a ni a, deputy chief minister Y Patton leh leader of opposition TR Zeliang-te chu co-convenor an ni. MLA Paiwang Konyak, Jacob Zhimomi, Mhathung Yanthan leh Amenba Yaden-te chu member an ni. MP KG Kenye leh Tokheho Yepthomi te chu special invitee niin, Commissioner of Nagaland leh Secretary of Border Affairs chu secretary-ah dah an ni.