JSU-in Meghalaya kutah Block-I pek kir leh phut

Assam leh Meghalaya-in ramri chinfelna tur inbiak thawh hnihna an neih mek karah, Jaintia Students' Union (JNU) chuan Block-I chu Meghalaya lamah pe kir leh turin an phut.

Block-I hi Assam-a Karbi Anglong autonomous district council hnuaai awm mek a ni. Mahse JSU chuan Meghalaya-a Jaintia Hills autonomous district council hnuaiah awm turin an phut a ni. An thil phut hi Meghalaya sorkara secretary, Cyril V Doengdoh hnenah pawh ziakin a thlen tawh.

Secretary hnenah lehkha an thehluhah, JSU chuan, "Assam sorkar chuan mipuite duhdan pawh ngaihtuah loin, kum 1951, April 13 khan khati hunlaia United Mikir leh North Cachar district siamna turin Jaintia Hills ram zau tak chu tihluihna hmangin a la a ni," an ti. Assam-in ram a laksak hi Meghalaya state hnena pek kir leh an phut tih an sawi.

State pahnihte hian ramri buaina an neihna, hmun 12 zinga hmun parukah inremna an siam tawh a, a bak hmun dang paruka inremna siam leh tumin August 21 aṭang khan inbiak thawh hnihna an nei leh ṭan a ni. Chief minister pahnihte meeting chuan an buaina neihna hmunte enfiah a, hma lak dan tur ngaihtuah turin regional committee pathum ve ve din leh an remti bawk.