Assam CM-in national capital 5 siam a rawt

Assam chief minister Himanta Biswa Sarma chuan twitter lama Delhi chief minister, Aam Aadmi Party (AAP) hruaitu Arvind Kejriwal nena an inbeihna kal zelah, India ramah national capital panga siam a rawt.

Himanta Biswa Sarma chuan bial hrang hrang inthlauhnate tihtawp a nih theihna atan, zone tin tan national capital siam ṭheuh a rawt a ni. He rawtna a siam rual hian Kejriwal a bei zui nghal a, Delhi CM chuan state dangte a nuihsawh fo nia puhin, state rethei zawkte nuihzat an ni loh a, bial hrang hrang inthlauhna awm tihtawp a nih theihna atan zone pangaah national capital neih ṭheuh a duh thu a sawi.

Assam sorkarin Class 10 board exam neihah zirlai pass awm lohna, sorkar school eng emaw zat khar a nih tur thu a puan chu Kejriwal chuan ṭha a tih loh thu leh, school khar ngawt lo a, zirna siamṭhat dan ngaihtuah zawk turin a ti. Hemi chungchang avang hian Sarma leh Kejriwal hi twitter lamah an inchhang zui a ni.

Education changtu ni bawk, Assam CM chuan Delhi CM hian a tihdan pangngaiin, Assam sorkar hnathawh ṭhatte chu haiderin a rawn sawisel leh niin a puh. Mahse Kejriwal chuan Assam sorkarin a hnathawh ṭha nia a sawi te chu a hmun ngeia en tura kal a duh thu sawiin a chhang zui ve leh bawk.