Tripura-a buaina chhuakah police 30 an hliam

Tripura-ah Thawh­lehni khan Indigenous People’s Front of Tripura (IPFT) party-te leh police-te an innawrbuai a, police 30-in hliam an tuar.

Tripura-ah hian tun­hnai khan tribal hmeichhe pakhat chu police-te'n an rubo niin thu a thang a, hei hi duh loin IPFT chuan lungawi lohna an lantir a ni. IPFT activist-te hian Bodhjungnagar-ah police-te hi lung leh hmanraw dang hmangin an bei a, buaina nasa zawk a chhuah hmain ṭhelh mih a ni. West Tripura District Police chief Abhijit Saptarshi chuan IPFT mi leh sa te hian Bodhjungnagar police station an bei a, Tripura State Rifles camp pawh an suasam tih a sawi. Dhalai district-a sorkar building eng emaw zat chu lungawi lohna lantirtute hian an tichhe bawk nia tarlan a ni.

IPFT chief NC Debbar­ma chuan hmeichhe rukbo chungchanga an party inrawlh anga sawi chu thudik lo a nih thu a sawi. Hetih rual hian rorel lai Communist Party of India - Marxist (CPI-M) mi leh sa eng emaw zat chu he thilah hian an inhnamhnawih niin a sawi. He thila mawhphurtute zinga an sawi Bimal Debbarma chu CPI-M mi leh sa a nih thu a sawi bawk.

Mipui pungkhawmte hnawhdarh nan hian tear-gas hman a ni a, buaina chhuahna hmunah hian CrPC Section 144 puan zui nghal niin, mi panga aia tam punkhawm khap a ni.