Nagaland : NPF-in Neiphiu Rio an suspend ve leh

Nagaland, Lok Sabha MP Neiphiu Rio chu Naga People’s Front (NPF) chuan an party aṭanga an sus­pend thu an puang ve leh.

NPF thuchhuah chuan Neiphiu Rio chu Chief Minister hlui Shurhozelie Liezietsu laka party dan kalha a chet avangin suspend a nih thu an sawi. NPF party chhung buaina hi a namai lo hle a, Rio bakah hian Chief Minister T.R.Zeliang-a pawh kum ruk chhung atan suspend a lo ni tawh a, MLA leh party mi leh sa eng emaw zat chu party thiltiha inhnamhnawih lo tura hrem an ni bawk. Zeliang-a thlawptu MLA 33-te chu party dan kalah cheah puin NPF hian an suspend a ni.

Heti chung hian chief minister Zeliang-a chuan Neiphiu Rio hi interim president a tan a ruat a, hetih lai hian Huskha Yepthomii chu Working President atan ruat a ni tawh bawk. NPF chuan Rio hi NPF sorkar paihthlak tuma cheah an puh a, a chetdan hi party dan kalh a nih thu an sawi. NPF Working Presidents Huskha Yepthomi chuan Rio chetdan chu a dem takzet tih a sawi a, TR Zeliang-a thlawpah a puh bawk. Hetih lai hian Rio hi engtia rei nge suspend a nih dawn a sawi lo thung. Rio hi TR Zeliang-a kaihhruai sorkar hmasaah, kum 2016 May khan party aṭanga suspend a lo ni tawh bawk.

July 19 khan NPF-in kum ruk chhung atana an suspend TR Zeliang-a chu chief minister atan lakluh a ni. Amah thlawptu MLA 33, NPF-in an party aṭanga an hnawhchhuah te chu August 5 ral hmain, Zeliang-a an thlawpna titawpa party-ah lut leh tura hriattir an ni. Hun tiam chunga party an zawm loh chuan disqualify an nih tur thu an tarlang bawk.