Liezietsu-a'n by-election-ah hnehna a chang

Nagaland chief minister hlui Dr. Shurhozelie Liezietsu chuan Northern Angami-I Assembly Constituency by-election neih zawh takah, vote 8038 hmuin hnehna a chang.

Northern Angami-I Consti­tuency by-election-ah hian Naga People’s Front (NPF) president Liezietsu leh Independent candidate Kekhrie Yhome-te chuan an chuh a, Liezietsu hian vote 63% hmuin, a khingpui Yhome chuan 37% a hmu ve bawk. A vaiin vote 12678 a tla a, vote tla zat hi 78.55% a ni. July 29 khan vote hi thlak a ni a, vote tla te hi nimin khan chhiar a ni a, result puan nghal a ni. Northern Angami-I bial hi Dr. Shurhozelie Liezietsu-a fapa Khriehu Liezietsu chuan May 24 khan a chhuahsan a, hetih hun lai hian a pa hi chief minister a ni. 

Dr Liezietsu hi MLA a nih loh avangin chief minister atan lakluh ni mah se, bial nei tura thlan tlin a ngai a ni. Hetih lai hian by-election neih hma hian chief minister a nihna aṭanga paithlak a ni a, a aiah chief minister hlui T.R Zeliang-a chu lakluh zui nghal a ni.