Disturbed Area paih tumna a awm lo : Manipur CM

Manipur Chief Minister N. Biren chuan an state huam chhunga hmun ṭhenkhat Disturbed Area-a puan mek chu ṭhiah tumna awm loh thu House a hrilh.

Manipur CM chuan Assembly Consituency ṭhenkhat chu Disturbed Area-ah puan mek an nih thu a sawi a, hei hi tun dinhmunah chuan ṭhiah tumna awm loh thu a sawi. Legislative Assembly Session-ah hemi chungchang hi opposition MLA, K. Ranjit chuan sawichhuakin, Biren Singh chuan hmun tam takah pawikhawihna leh tharum thawhna a la thlen fo thu leh, boruak a la ralmuan tawk loh thu a sawi. Hetih rual hian Disturbed Area chuan Greater Imphal huam chhunga constituence 10 chu a huam ve loh thu a sawi bawk.

CM chuan, mipuite himna ngaihpawimawh a ni thu sawiin, tharum thawhna leh inrikrapna tireh tur te, hel te pawikhawihna titawp tur chuan dan khauh zawk kenkawh a la ngaih thu a sawi. Disturbed Area-a chengte himna turin dan hi kalpui zel a ngai a, hlih a nih chuan thil duhawm loh zawk a thlen theih thu a sawi. Manipur mai ni lo hmarchhak hmun eng emaw zat chu sorkar laipuiin Disturbed Area-ah a puang tih sawiin, heng hmunahte hian a ṭul dan anga pawhsei ṭhin a ni, a ti. Manipur hmun tam takah pawh hei hi kenkawh a, pawhsei zui zel a ngai a, ṭhiah tumna emaw, pawtsei lo tura hmalak tumna a awm loh thu a sawi a ni.