Rahul-a'n Assam-a tuilian tuarte a tlawh

Congress vice president Rahul Gandhi chuan Assam-a tuilian tuarte chu Ningani khan a tlawh a, an harsatna tawh hrang hrang­te a hmunah kalin a enfiah a ni.

Congress hruaitu Rahul Gandhi hian tuilian tuar nasa ber Lakhimpur district a tlawh a, hmun hrang hranga chhiatna thlengte a hmunah kalin a enpui a ni. Lawng hmangin hmun hrang hrang fanpui a ni a, tuilianin thlai chinna hmun a tichhiat bakah, infrustructure chhiate siam ṭhat leh a nih theih nan hma lakpui a tum thu a sawi. Rahul Gandhi chuan, "Assam mipuiten harsatna nasa tak an tawk a, ka tawrhpui hle a ni. Mipui an mangang a, mihring leh ramsa eng emaw zatin nunna an chan hi a pawi ka ti hle. In tawrhna hi ka hriatthiampui che u a, in tan kei leh Congress party-te kan ding zel ang" tiin tuilian tuarte a tawrhpui thu a sawi.

Rhul Gandhi chuan tuilian avanga chhiatna hrang hrang tawkte chuan zángnadawmna an dawng ngei tur a nih thu sawiin, hemi tur hian amah pawhin hma a lak tur thu a sawi. Hemi chungchang hi parliament-ah pawh a sawi chhuah tur thu a sawi bawk. Rahul Gandhi hian a cham chhung hian Silchar a tlawh bawk a, tun hnaia boral Union minister Santosh Mohan Dev chhungte a tlawh a ni.

Assam-ah hian tuilian avanga nunna chan mi 79 an awm tawh a, ramsa za chuang an thi tawh bawk. Tuilian tuar hi mi nuai 25 vel an tling a, district hrang hranga khaw 800 vel zet chu tuilianin a chimpil a ni. Thlai chinna hmun ram zau tak chu tuilian hian a chim bawk a, hmun tam takah inkalpawhna leh inbiak pawhna a buai phah a ni.