Meghalaya CM-in Cabinet minister pahnih a ban

Meghalaya Chief Minister Mukul Sangma chuan a cabinet minister pahnih banin, minister thar pahnih la lut turin hma a la.

Chief Minister Mukul Sangma hian Ningani khan Prestone Tynsong leh Sniaw­bhalang Dhar-te chu a cabinet minister aṭangin a ban a, hemi rual hian Comingone Ymbon leh Celestine Lyngdoh-te chu minister atan a la lut dawn. Hemi chungchangah hian Sangma chuan Governor Banwarilal Purohit chu Raj Bhavan-ah meeting a neihpui tawh a, minister thar turte hi lakluh thuai a tum.

Rorellai Congress party chuan thuchhuah siamin, Community and Rural De­velopment Minister Pres­tone Tynsong leh Power Minister Sniawbhalang Dhar-te chu party dan kalha an chet avangin minister an nihna aṭangin ban an ni a, an aiawh tur ruat nghal a nih thu an tarlang.

Minister aṭanga ban tak Sniawbhalang Dhar chuan cabinet minister siksawi chungchang hi official-a hriattir an nih loh thu a sawi a, an chunga rorel danah an lawm lo hle tih a sawi. Minister ban an nih chungchang hi Nilaini-a Congress Vice President Rahul Gandhi-a'n Nilaini-a chief minister Sangma leh Meghalaya Congress President D.D. Lapang-te meeting a neihpui hnua siam a nih rin a ni. Nilaini khan Congress party hian meeting an nei a, an party hruaitu ṭhenkhatin BJP zawm an tum nia thuthang awm mek chungchanga hma lak dan tur an sawiho a ni. Hma la turin All India Congress Committee chuan member 10 awmna Committee a din a, an ni hian hma an la dawn a ni. Committee member-ah hian hian Mukul Sangma, Deputy Chief Minister R.C. Laloo, Education Minister Deborah Marak, Urban Affairs Minister R.V. Lyngdoh, Public Works Department Minister M.M. Danggo, Urban Affairs Minister R.V. Lyngdoh leh assembly speaker hlui Charles Pyngrope-te pawh an tel a ni.