JD(U)-in Manipur sorkar an thlawpna hnuhdawk dawn

Nitish Kumar-a party, Janata Dal (United) chuan Bihar-a BJP nena an thawhdunna an tihtawp hnuah, Manipur-a BJP kaihhruai sorkar an thlawpna pawh an hnukdawk dawn.

September 3-4 hian JD(U) in Patna-a national executive meet an neih hunah party hruaitu lute leh Manipur unit hruaituten meeting neiin, an thu-tlukna hi an puang ang.

Manipur chief minister N Biren Singh kaihhruai sorkar aṭangin JD(U) hi inhnuhdawk mah se, BJP sorkar dinhmun hi a derthawng pha dawn lo a ni. BJP kaihruai ṭangrual sorkar hian seat 60 awmna, Manipur assembly-ah hian thlawptu MLA 55 a nei mek a, an zingah hian JD(U) MLA pasarih an tel. JD(U) MLA-te tello pawhin ṭangrual sorkar hian MLA 48 a la nei pha dawn tho a ni. Sorkar siam tur hian MLA 31 neih tlin a ngai a ni.

Kumin kumtir lama Assembly inthlan neih dawnah khan BJP leh JD(U) hi an thawkdun nghal lo a, mahse BJP kaihhruai sorkar a din tak hnuah, JD(U) MLA-te chuan NDA-ah an party an tel ve vangin sorkar hi an thlawp ve chauh a ni.