Assam-ah hmeichhe laka pawikhawihna thleng report sang ber

National Crime Records Bureau (NCRB) in 2021 report a tihchhuahah, kum 2021 chhung khan India ram state zingah Assam chu hmeichhe laka pawikhawihna thleng tamna ber niin, a zawnin kum nga a ni tawh a ni.

Nikum chhunga Assam-a hmeichhe laka pawikhawihna thleng rate hi 168.3 a ni a, hetihlai hian ram pum huapa crime rate chu 64.5 a ni thung. Assam dawtah Delhi awmin 147.6 a ni a, Odisha chu 137.8 a ni bawk.

Kum 2020 khan Assam-a hmeichhe laka pawikhawihna, crime rate hi 154.3 niin, kum 2019-ah 177 leh 2018-ah 166 a ni.

Kum 2021 khan Assam-ah pawngsual thubuai ziahluh 1,835 a awm a, kum 2020 khan 1,658 ziahluh a ni. Pawngsual tuma puhna thubuai 563 leh, mawi lo taka mipat hmeichhiat lama inkhawihna thubuai 4,511 ziahluh a ni bawk.

Ram pum huapa thuamchhawm, dowry kaihhnawiha thubuai ziahluh leh thihna thleng a tlem chhoh laiin, Assam-ah erawh chuan a pung thung. Nikum khan dowry kaihhnawiha buainaah hmeichhia 198 an thi a, kum 2020 khan 150 an thi bawk. Acid hmanga hmei-chhia beihna thubuai pakua a awm bawk a ni.

Assam State Com-mission for Women chairperson hlui, Chikimiki Talukdar chuan dowry kaihhnawiha buaina leh thihna thleng a la pung zel chu a pawi takzet tih sawiin, inzirtirna ṭha neih a ṭul hle tih a sawi.

Kum 2021-a Assam-a hmeichhe laka pawikhawihna thleng thubuai ziahluh zinga 12,950 chu an pasal emaw, an chhungte mipa emaw kut tuarte an ni. Hmeichhe rukbo thubuai 5,866 ziahluh zinga 3,362 chu pasal neih luih tir tuma rukbote an ni bawk.

Protection of Children from Sexual Offences (POCSO) Act hnuaiah thubuai 1,948 ziah niin, heng zinga 1,317 chu kum tling lo pawngsual, mipat hmeichhiat lam hawia khawihna case 424 a tel. Kum 2020 khan Assam-a POCSO Act hnuaia thubuai ziahluh hi 1,496 a ni.

Cyber-crime lama hmeichhiate beihna thubuai 432 ziahluh a ni bawk a, heng zingah hian hmeichhiate thlalak mawi lo tak tihchhuahsak thubuaite a tel.